UNHA VIAXE A TRAVÉS DAS LETRAS-Textos escollidos

ALUMNADO CON NEAE DE 1º E 2º DA ESO DO IES CASTRO ALOBRE DE VILAGARCÍA DE AROUSA

Bos días!  Como estades?... Xa falta pouco para rematar o curso.

Hoxe tócanos falar dun poeta e xornalista representante do período histórico-ĺiterario denominado Rexurdimento da literatura galega  a quen se lle dedicou o día das Letras Galegas no ano 1967.

É Manuel Curros Enríquez (1851-1908), o príncipe dos poetas galegos. En palabras de Carballo Calero na súa Historia da Literatura Galega Contemporánea: ..."perante o público do seu tempo, Curros triunfou plenamente como poeta..."

En 1880 publica Aires da Miña Terra e o bispo de Ourense denunciou ó escritor por herexías e ataques a relixión e Curros foi procesado. O seu avogado conseguiu a súa absolución.

En 1894 decide emigrar a América. Na Habana, onde morre en 1908, dirixe o xornal La Tierra Gallega e despois escribe no Diario de la Marina.

Agora imos ler o poema que Curros lle adica a Mariquiña Puga, a filla do seu avogado, cando esta marcha a Cuba.

 Despedida

Como ti vas pra lonxe

i eu vou pra vello,

un adiós,Mariquiña,

mandarche quero,

que a morte é o diaño

i anda rondando as tellas

do meu tellado.

Cando deixes as costas

da nosa terra

nin lus nin poesía

quedará nela.

Cando te vaias

vaise contigo o ánxel

da miña garda.

Pombiña mensaxeira

de branca pruma,

fálalle ós emigrados

da patria súa.

Dilles, mimosa,

que deles apartada

Galicia chora.

Dilles que prós seus lares

tornen axiña;

que sin eles non queren

pintar as viñas,

regar os regos,

madurar as castañas

nos castiñeiros.

Dilles que non hai terra

millor que a nosa,

máis ridentes paisaxes,

máis frescas sombras,

máis puros ceos,

nin lúa máis  lucente

no firmamento.

Dilles que súas obrigas

eiquí os esperan,

¡e se onde elas non morren

que se condena!...

I agora voa,

pombiña, e que te guíe

Nosa-Señora.

Agora ides a escoitar O Maio, un dos poemas máis coñecidos de Curros, no que o poeta invoca unha primavera de liberdade e xusticia:

 https://www.youtube.com/watch?v=m-Zv4dqcKqQ